Дырэктар ААТ «Чырвоны харчовік» Ігар Кісель і намеснік дырэктара па стратэгічным развіцці Юрый Хілінскі напярэдадні 1 верасня павіншавалі з надыходзячым святам дзве шматдзетныя сем’і, чые маці працуюць на фабрыцы: сям’ю Давыдавічаў і сям’ю Сянчыла.
Адзін з «вінаватых» мерапрыемства, школьнік Данііл Давыдавіч, падарунак прыняў асабіста з рук Ігара Мікалаевіча. Кіраўнік прадпрыемства пахваліў хлопчыка за выдатную вучобу (Данііл не толькі практычна круглы выдатнік, але і пастаянны ўдзельнік і прызёр гарадскіх Алімпіяд па рускай мове) і ўручыў яму заплечнік, унутры якога — сувенірная прадукцыя, школьныя прыналежнасці і лепшыя прысмакі фабрыкі. Акрамя таго, для хлопца правялі індывідуальную экскурсію па прадпрыемстве: Данііл нават паспрабаваў сябе ў ролі «майстра зефірных спраў»: пад кіраўніцтвам дасведчанага супрацоўніка пагрузіўся ў займальныя працэсы стварэння ўнікальных прысмакаў.
Кіраўніцтва фабрыкі пажадала шматдзетным сям’я поспехаў у вучобе, моцнага здароўя і выдатнага настрою ў новым навучальным годзе.
