Прама ў сэрцы транспартнага вузла Бабруйска, на чыгуначным вакзале (вул. Чыгуначная, 13), пасля пераезду адкрылася фірмовая крама №7 ад легендарнай фабрыкі «Чырвоны харчовік». Гэта не проста новая кропка на карце, а, можна сказаць, яшчэ і стратэгічна важнае месца для жыхароў і гасцей горада!
Урачыстую цырымонію адкрыцця правялі старшыня Бабруйскага гарвыканкама Максім Гурын і дырэктар прадпрыемства Ігар Кісель, якія і перарэзалі сімвалічную чырвоную стужку.
— Для нас гэта знакавая падзея, — адзначыў Ігар Мікалаевіч. — Вакзал — гэта вароты горада, месца, дзе фармуюцца першыя і апошнія ўражанні. Цяпер у кожнага госця і жыхара Бабруйска ёсць ідэальная магчымасць не з’ехаць з пустымі рукамі, а захапіць з сабой крыху салодкай бабруйскай магіі.
На адкрыцці ўсіх прысутных чакала дэгустацыя навінак, але ўсеагульную ўвагу прыкаваў да сябе вялікі зефірны торт, які жыхары і госці горада з задавальненнем паспрабавалі ці забралі з сабой у дарогу.
Так што зараз любы доўгі шлях можа стаць саладзей у прамым сэнсе. Пяць хвілін — і ў руках не толькі білет на цягнік, але і фірмовы пакет, напоўнены як традыцыйнымі прысмакамі, так і навінкамі фабрыкі.
Гэта больш чым крама — гэта фінальны акорд візіту ў Бабруйск або цёплае пажаданне ў дарогу!
